Joan den irailaren 11n, Bruselan TRUEHOME europar proiektua abiarazteko bilera egin zen (Kick-Off Meeting). Horizon Europe programak finantzatutako ekimena da, eta datozen lau urteetan Europan etxebizitza eskuragarriaren kontzeptua eraldatzeko lan egingo du. Proiektuak Belgika, Espainia, Eslovenia eta Alemaniako 13 entitateko partzuergoa biltzen du, TH! NK Ek koordinatua, Europako Bauhaus Berriaren printzipioekin bat datozen etxebizitza sozialak eta eskuragarriak sustatzeko eta birgaitzeko irtenbide berritzaileak garatzeko helburuarekin: iraunkortasuna, inklusioa eta kalitate arkitektonikoa. TRUEHOMEk "benetako eskuragarritasunaren" (true affordability) kontzeptuan oinarritutako eskuragarritasunaren ikuspegi berritzaile bat planteatzen du. Kontzeptu horrek, eraikuntza- eta erabilera-kostuez gain, hainbat faktore barne hartzen ditu, hala nola energia, mugikortasuna, osasuna, ongizatea edo ingurumen-inpaktua.
Esparru horretan, Visesaren ekarpena industrializazioan, sistema modularretan, material biooinarrituetan eta herritarren parte-hartzean oinarritutako metodologiak probatzera bideratzen da, eta, gainera, etxebizitzaren benetako kostua kontratatzeko, finantzatzeko eta ebaluatzeko formula berriak garatzen laguntzen du bere bizi-ziklo osoan.
TRUEHOMEn parte hartzeak indartu egiten du Visesak herritarrei etxebizitza eskuragarria, jasangarria eta kalitatezkoa eskuratzeko duen konpromisoa. Proiektuaren emaitzek aukera emango dute kostuak murrizten, energia-eraginkortasuna hobetzen, eraikuntza-prozesuak bizkortzen eta bizitegi-sustapenen gizarte- eta ingurumen-balioa handitzen lagunduko duten irtenbideak aztertzeko, kalitate arkitektonikoari eta erabiltzaileen ongizateari uko egin gabe. Era berean, proiektuak aukera estrategikoa eskainiko dio Visesari etxebizitza publikoari aplikatutako berrikuntzan Europako erreferente gisa duen posizioa indartzeko.