San Ignazio eta Deustu artean estrategikoki kokatuta, Zorrotzaurre Bilboko hiri-iraunkortasunaren eta -suspertzearen ikur gisa agertzen da. Deustuko Kanala irekitzeari esker 2018tik uharte den penintsula hori hiri-berreskuratzearen eredu da, ingurumen- eta gizarte-jasangarritasunarekin konpromiso sendoa duena.

838.781,25 m²-ko azalera du Zorrotzaurrek, eta bizitegi-, merkataritza- eta aisialdi-erabilerak lotzeko planifikatu da, hiri-garapen trinkoa ziurtatuz eta mugikortasun jasangarria bultzatuz. Hiri-diseinu inklusiboa nabarmentzen da; izan ere, eremuaren bi heren espazio publikoetarako izango dira, berdegune zabalak eta erkidego-erabilerako ekipamenduak izango dituzte, hezkuntzatik hasita kulturaraino.

Zorrotzaurre berria bizitzeko lekua baino gehiago da: hazteko, lan egiteko eta gozatzeko lekua da. Mugikortasun jasangarria eta tokiko historiaren zaintza ardatz izanik, auzoa oinezko eta txirrindulari izateko diseinatuta dago, eta erabat integratuta dago Bilbo hiriarekin.

Proiektuak 5.620 etxebizitza inguru biltzen ditu, horietatik erdiak babes publikokoak, 922 etxebizitza babestu Visesak sustatuta eta 266 Eusko Jaurlaritzak; gainera, Eusko Jaurlaritzak alokairuko 57 zuzkidura-bizitoki sustatuko ditu, guztiak irisgarritasuna eta aniztasuna azpimarratuz.

Zorrotzaurre proiektua:

• Eragin ekonomikoa:

  Jarduera berrien katalizatzailea: Zorrotzaurrek ekonomia- eta aisialdia-jarduera berrien sorrera sustatzen du, besteak beste IDOM egoitza eta IMQ klinika.

  Berrikuntza teknologikoa: Uhartean Espainiako lehenengo hiri-parke teknologikoa ezarriko da.

  Sormen-zentroa: Uhartea sormen-gune bihurtzen ari da, jarduera kultural eta artistikoak egiten baitira industria-espazio berregokituetan.

  Enpleguaren sorrera: Visesaren azterlanaren arabera (2013), aurreikusten da 3.377 zuzeneko enplegu sortuko direla eraikuntzan eta eraikingintzan, eta 1.800-2.100 urbanizazioan. Horiez gain, zeharkako 2.373 enplegu sortuko dira, hau da, guztira 5.741 enplegu.

  Zerga-itzulera: Inbertsioak gutxi gorabehera % 53ko zerga-itzulera eragingo du administrazio publikoentzat, hau da, 678 milioi euroko itzulera, CEOEren txosten baten (2013) arabera.

• Gizarte-eragina:

  Herritarren partaidetza: Bertako herritarrak aktiboki inplikatuta daude Zorrotzaurre zaharberritzeko prozesuan.

  Auzoa hobetzea eta errebalorizatzea: Proiektuak hobetu egiten du auzoaren irudia eta handitu egiten du zaharberritutako etxebizitzen balioa.

  Etxebizitza eskuragarriak: Parkeko etxebizitzen % 50 babes publikokoak izango dira; hala, eskuragarritasuna bermatzen da.

  Oinezkoen eremua sustatzea: Aisialdi-eremuak sortzea Itsasadarraren ondoan eta garraio publikoaren balioa handitzea, uhartean tranbia barne.

• Ingurumen-eragina:

  Lurzoru kutsatuak leheneratzea: Aurretik kutsatutako eremuak garbitzea eta birgaitzea.

  Uholdeak prebenitzea: Zorrotzaurren eta inguruko eremuetan uholde-arriskua murrizteko neurriak.

  Itsasadarra leheneratzea: Ibaiertzean pasealekua egitea eta Itsasadarraren aldea indartzea.

  CO₂ isuriak murriztea: CO₂ isuriak % 90 murriztea, etxebizitza guztiek betetzen baitituzte NZEB (ia energia-kontsumorik gabeko eraikinak) estandarrak.

San Ignazio zubia

Visesak sustatutako lehenengo zubia da. Izen bereko auzoa eta itsasadarraren gaineko Zorrotzaurre uhartea elkartzen ditu. Visesarentzat proiektu berezia izan da, bere jarduera nagusia alokairuko etxebizitza babestua sustatzea baita.

Zubiak 75 metroko argia libratzen du, eta taularen zabalera 28 metrokoa da. Oinezkoen eta ibilgailuen zirkulaziorako euskarria da. Zubiaren egitura mistoa da, hormigoia eta altzairua, eta azken horrek Bilboko tradizio siderurgikoari egiten dio erreferentzia. Zubia bi arku beheratu simetrikoz osatuta dago. Arku horiek taularen azpitik abiatzen dira estribuetan, eta erdiko tartean 3 metroraino igotzen dira.

Egitura muntatzeko maniobra (2020ko urtarrila): bideoa